Hum Aaj Bazm-e-Raqiban Se Surkh-Ru Aae

ham aaj bazm-e-raqiban se surḳh-ru aae

ye hai ajiib ki ab vo bhi hu-ba-hu aae

hai kaun yaan jo nahin jam-o-mai ka shaidai

ye kab ho aap hi chal kar kahin subu aae

sabhi ne jaan di teri gali men ai hamdam

kise majal ki ab tere ru-ba-ru aae

tire firaq men ham ne bahae ashk-e-jigar

ye sab ne chaha magar aae to lahu aae

hai ab kahan vo vafa aur vo vafa-keshi

vo aur vaqt tha ham dekh ku-ba-ku aae

Leave a Comment