jahan-e-husn-o-nazar se kinara karna hai
vajud-e-shab ko mujhe isti.ara karna hai
mire daricha-e-dil men Thahar na jaa.e kahin
vo ek ḳhvab ki jis ko sitara karna hai
tamam shahr andheron men Duub ja.ega
hava ko ek hi us ne ishara karna hai
ye qurbaton ke hain lamhe inhen ghanimat jaan
inhi dinon ko to ham ne pukara karna hai
vo doston ko bata.ega pyaar ka qissa
aur us ne zikr bahut kam hamara karna hai
miri nigah men jachta nahin koi ‘asif’
visal-e-yar ko hasil dobara karna hai
Leave a Reply