Zara Se Gham Ke Liye Jaan Se Guzar Jaana

zarā se ġham ke liye jaan se guzar jaanā

mohabbatoñ meñ zarūrī nahīñ hai mar jaanā

kabhī lihāz na rakhnā kisī rivāyat kā

jo jī meñ aayā use ham ne mo’atabar jaanā

vo ret ret fazā meñ tirī sadā kā sarāb

vo be-irāda mirā raah meñ Thahar jaanā

tamām raat bhaTaknā tire ta.āqub meñ

tire ḳhayāl kī sab sīḌhiyāñ utar jaanā

vo man meñ chor liye phirnā tere saa.e kā

galī ke moḌ pe dīvār-o-dar se Dar jaanā

‘shakīl’ gaañv ke sab log so ga.e hoñge

ab itnī raat ko achchhā nahīñ hai ghar jaanā

Leave a Comment