Liaqat Jafri
muslim huun par ḳhud pe qaabu rahta hai
mere andar bhi ik hindu rahta hai
koi jadugar ke baazu kaaT bhi de
us ke haath men phir bhi jaadu rahta hai
raat ga.e tak bachche dauḌte rahte hain
mere kamre men ik jugnu rahta hai
‘mir’ ka divana ‘ghalib’ ka shaida.i
meri basti men ik sadhu rahta hai
us ke labon par english vinglish rahti hai
mere honT pe urdu urdu rahta hai
aql hazaron bhes badalti rahti hai
ye dil mar jaane tak buddhu rahta hai
Leave a Reply