koi sunta hi nahin un ki sada mere ba.ad
haa.e kya vaqt andheron pe paḌa mere ba.ad
vaqt se pahle hi ab us ki sahar hoti hai
hui mansuḳh shab-e-gham ki saza mere ba.ad
ghair ko us ne shab-e-vasl men DanTa do baar
mil gaya mujh ko vafaon ka sila mere ba.ad
koi jaata nahin bachchon ki qataren le kar
haspatalon men vo charcha na raha mere ba.ad
weight lifter koi mujh sa na hua jo paida
kaun uTha.ega tire naaz bata mere ba.ad
ḳhuun hai dil ḳhaak men ahval-e-butan par ya.ani
kis ka ye ja ke daba.enge gala mere ba.ad
apni mahrumi-e-qismat pe hansi aati hai
duudh bazar men ḳhalis bhi bika mere ba.ad
mere matam men nahin apni raqam ke gham men
shahr ka baniya siyah-posh hua mere ba.ad
un ki tafrih ka saman-e-tarab tha main hi
doctor log hain jiine se ḳhafa mere ba.ad
rasm-e-iflas ki tahzib thi mujh se qaa.em
uTh ga.i dahr se jiine ki ada mere ba.ad
Leave a Reply