Ataul Hasan
shauq-e-nazar gulab se bhi mutma.in nahin
chashm-e-udas ḳhvab se bhi mutma.in nahin
kis umr men na-jane qana.at pasand ho
ye dil ki dastiyab se bhi mutma.in nahin
ab tere ḳhadd-o-ḳhal pe kya iktifa kare
ye aankh mahtab se bhi mutma.in nahin
bas yunhi be-qarari ki lat men huun mubtala
vaise main iztirab se bhi mutma.in nahin
mere bhale dinon pe bhi vo mo’tariz raha
ab sa.at-e-ḳharab se bhi mutma.in nahin
kitnon ko rah-e-rast pe laaya ‘hasan’ magar
darvesh is savab se bhi mutma.in nahin
Leave a Reply