ankhon ke a.inon men tavana.i aa.egi
dekhega sabz khet to bina.i aa.egi
pa.ega ḳhushbuon se zaminon ke bhed bhi
ik roz tere kaam shanasa.i aa.egi
peḌon ki chhanv chhoḌ kisi ab-e-ju pe baiTh
tujh men nahin to aks men ra.ana.i aa.egi
duniya ki sair kar ke nikhar ja.ega ḳhayal
taaza hava lagegi to dana.i aa.egi
har naqsh ab-o-ḳhak ka dil men utaar le
fankar hai to taqat-e-goya.i aa.egi
sha.ir ki tarah Dol raha hai ḳhalaon men
logon men baiTh anjuman-ara.i aa.egi
andhon ke is nagar men diye ki misal ban
sahra men gul khulega to yakta.i aa.egi
shaffaf paniyon ki tarah zindagi guzar
suraj ki tarah tujh men tavana.i aa.egi
ghar men diya jala ki lage bolta hua
divar-o-dar pe zinat-o-zeba.i aa.egi
saaya bhi tera tujh ko kahin chhoḌ ja.ega
aa.i bhi tere kaam to tanha.i aa.egi
garmi bahut hai aaj khula rakh makan ko
us ki gali se raat ko purva.i aa.egi
kaafi hai jo ghazal ke liye kah liya ‘ḳhalil’
aage qadam rakhega to gahra.i aa.egi
Leave a Reply