Chandni Pandey
zindagi ki yahi kahani hai
saans aani hai aur jaani hai
tum jo hote to baat kuchh hoti
ab ki barish to sarf paani hai
ik taraf us ki bolti ankhen
ik taraf meri be-zabani hai
yuun hi sunte rahen agar dil ki
yaad rakhiye ki jaan jaani hai
dhuup lagti hai badalo jaisi
ye mohabbat ki sa.ebani hai
bahti jaati huun ik samundar men
us ki yaado ki badbani hai
har taraf ḳhaar ḳhaar hai gulshan
baghban ḳhuub baghbani hai
ashna huun main ab sarabon se
main ne sahra ki ḳhaak chhani hai
‘chandni’ ki ghazal-vazal sahab
us ke ḳhvabon ki tarjumani hai
Leave a Reply