jaise kisi tufan ka ḳhadsha bhi nahin tha
kya log the andesha-e-farda bhi nahin tha
vo kaise musafir the ki be-zad-e-safar the
siine pe koi bar-e-tamanna bhi nahin tha
kyuun log mazaron pe dua maang rahe the
mujh par kisi aaseb ka saaya bhi nahin tha
kis bagh-e-tilismat men gum ho ga.iin ankhen
main ne tiri janib abhi dekha bhi nahin tha
kyuun taaza hava ka koi jhonka nahin aaya
ehsas ke dar par koi parda bhi nahin tha
nashsha dar-e-gandum ka hiran hone se pahle
jannat se nikalna hai ye socha bhi nahin tha
girti hui divar ko sab dekh rahe the
is shahr men kuchh aur tamasha bhi nahin tha
na-karda-gunahi ki saza de mujhe ya-rab
jo kaam kiya main ne vo achchha bhi nahin tha
Leave a Reply