Dil Ki Kahaniyon Ko Naya moD Kyun Diya

dil kī kahāniyoñ ko nayā moḌ kyuuñ diyā

rishtoñ ke TuuTe shīshe ko phir joḌ kyuuñ diyā

dahlīz par jalā ke sar-e-shām ik charāġh

darvāza tum ne ghar kā khulā chhoḌ kyuuñ diyā

gul-dān meñ saje hue naqlī gulāb par

ik bad-havās titlī ne dam toḌ kyuuñ diyā

tūfāñ se laḌ rahā thā vo sāhil ke vāste

sāhil milā to naav kā ruḳh moḌ kyuuñ diyā

ye dekhiye vo ḳhush hai bahut mujh ko chhoḌ kar

mat pūchhiye ki us ne mujhe chhoḌ kyuuñ diyā

Leave a Comment