Diwar Pe Rakkha Hua miTTi Ka Diya Main

Saud Usmani

divar pe rakkha hua miTTi ka diya main

sab kuchh kaha aur raat se kuchh bhi na kaha main

kuchh aur bhi maskan the mire dil ke alava

lagta hai kahin aur bhi mismar hua main

is dukh ko to main Thiik bata bhi nahin paata

main ḳhud ko mayassar tha magar mil na saka main

jaaga huun magar ḳhvab ki dahshat nahin jaati

kya dekhta huun yaar tujhe bhuul gaya main

suraj ke ufuq hote hain manzil nahin hoti

so Dhalta raha jalta raha chalta raha main

ik ishq-qabila miri miTTi men chhupa tha

ik shaḳhs tha lekin koi ik shaḳhs na tha main

ik ghunT ki vaq.at mire pindar se kam thi

is baat se vaqif mira mashkiza hai ya main

ik jism men rahte hue ham duur bahut the

ankhen na khulin mujh pe na ankhon pe khula main

kuchh aur bhi darkar tha sab kuchh ke alava

kya hoga jise DhunDta tha tere siva main