Hari Chand Akhtar
jahan tujh ko biTha kar pujte hain pujne vaale
vo mandir aur hote hain shivale aur hote hain
dahan-e-zaḳhm se kahte hain jin ko marhaba bismil
vo ḳhanjar aur hote hain vo bhale aur hote hain
jinhen mahrumi-e-tasir hi asl-e-tamanna hai
vo aahen aur hoti hain vo naale aur hote hain
jinhen hasil hai tera qurb ḳhush-qismat sahi lekin
tiri hasrat liye mar jaane vaale aur hote hain
jo Thokar hi nahin khate vo sab kuchh hain magar vaa.iz
vo jin ko dast-e-rahmat ḳhud sambhale aur hote hain
talash-e-sham.a se paida hai soz-e-na-tamam ‘aḳhtar’
ḳhud apni aag men jal jaane vaale aur hote hain
Leave a Reply