Ehsan Danish
aaya nahin hai raah pe charḳh-e-kuhan abhi
ḳhatre men dekhta huun chaman ka chaman abhi
uTThenge apni bazm se mansur saikaḌon
kaam ahl-e-haq ke a.enge dar-o-rasan abhi
ranj-o-mehan nigah jo pheren to pher len
lekin mujhe aziiz hain ranj-o-mehan abhi
baḌhne do aur shauq-e-shahadat avaam men
kuchh banjh to nahin hai ye ḳhak-e-vatan abhi
ankhon ki surḳhiyan hain aza.em ka ishtihar
siine sulag rahe hain lagi hai lagan abhi
ye karvan shanavar-e-tufan to hai magar
chehron pe bolti hai safar ki thakan abhi
hain samne hamare rivayat-e-kar-zar
bandhe hue hain sar se mujahid kafan abhi
ban ban ke jaane kitne fana honge somnat
baste hain har gali men yahan but-shikan abhi
ai shahryar ham se shikasta-dilon men aa
teri taraf se ḳhalq ko hai husn-e-zan abhi
raqsan abhi hain sham-e-ghariban ki jhalkiyan
raushan nahin hai ḳhanda-e-sub.h-e-vatan abhi
jiite rahen umiid pe rindan-e-tishna-kam
chalta nahin hai daur-e-sharab-e-kuhan abhi
jin ke lahu se qasr-e-vafa men jale charagh
in gham-zadon men aam hain ranj-o-mehan abhi
gulshan se phuul chal ke mazaron tak aa ga.e
lekin hai baghban ki jabin par shikan abhi
hai ilm ki nigah se pinhan rah-e-amal
kahte nahin kafan ko yahan pairahan abhi
nabz-e-bahar par hain bagulon ki ungliyan
chalne ko chal rahi hai nasim-e-chaman abhi
shabnam ke ashk sukhne deti nahin faza
hansta hai ḳhud bahar-e-chaman par chaman abhi
har gaam har maqam pe koshish ke bavajud
‘danish’ na aa saka mujhe jiine ka fan abhi
Leave a Reply