ab kahin aur kahan ḳhak-basar hon tire bande ja kar
zindagi aur bhi maghmum lage shahr se aage ja kar
adam-abad ke logon ka mizaj in dinon kaisa hoga
lauT aane ki tavaqqo.a ho kisi ko to vo puchhe ja kar
main ghana peḌ huun aaya bhi kabhi jo mire saa.e ko zaval
in ḳhizaon se bahut duur girenge mire patte ja kar
kaT bhi sakte hain shab o roz mire in hi gali kuchon men
lauTna hai tiri janib hi agar tere nagar se ja kar
sha.eri phuul khilane ke siva kuchh bhi nahin hai to ‘zafar’
baagh hi koi lagata ki jahan khelte bachche ja kar
Leave a Reply