Farhat Qadri
raton ke andheron men ye log ajab nikle
sab nam-o-nasab vaale be-nam-o-nasab nikle
ta.amir-pasandi ne kuchh ziist par uksaya
kuchh maut ke saman bhi jiine ka sab nikle
ye nuur ke saudagar ḳhud nuur se aari hain
gardun pe mah-o-anjum tanvir-talab nikle
ye dasht ye sahra sab viran hain barson se
is samt bhi divana takbir ba-lab nikle
tahzib ki bebaki aisi to na thi pahle
ham jab bhi kahin nikle ta-hadd-e-adab nikle
taskin ke liye ham ne jin se bhi guzarish ki
ham se bhi ziyada vo taskin-talab nikle
hasti ki masafat men apna jinhen samjha tha
jab vaqt paḌa ‘farhat’ vo mohr-ba-lab nikle
Leave a Reply