Mohsin Zaidi
ye hain jo astin men ḳhanjar kahan se aa.e
tum siikh kar ye ḳhu-e-sitamgar kahan se aa.e
jab tha muhafizon ki nigahbaniyon men shahr
qatil fasil-e-shahr ke andar kahan se aa.e
kya phir mujhe ye andhe kuen men gira.enge
ban kar ye log mere baradar kahan se aa.e
ye dasht-e-be-shajar hi jo Thahra to phir yahan
saaya kisi shajar ka mayassar kahan se aa.e
uslub mera siikh liya tum ne kis tarah
lahje men mera Dhab mire tevar kahan se aa.e
maazi ke a.inon pe jila kaun kar gaya
pesh-e-nigah phir vahi manzar kahan se aa.e
daur-e-ḳhizan men kaise palaT kar bahar aa.i
pazh-murda shaḳh par ye gul-e-tar kahan se aa.e
‘mohsin’ is iḳhtisar pe qurban ja.iye
kuuze men band ho ke samundar kahan se aa.e
Leave a Reply