hamrah us ke sub.h chale shaam bhi chale
par le ke koi amn ka paigham bhi chale
ab kya ilaj-e-dard-e-dil-e-be-talab karun
kuchh ho to un se nama-o-paigham bhi chale
ai dil nikal aisi koi raah ishq men
tu bhi rahe sukun se mira kaam bhi chale
guzre nahin hain sirf chaman hi se ai bahar
ham dekhte hue tira anjam bhi chale
duniya-e-be-sabat ki chahat to dekhiye
har shaḳhs chahta hai mira naam bhi chale
ham ne kiya hai aaj ‘ḳhalish’ azm-e-mai-kada
kah do ki saath gardish-e-ayyam bhi chale
Leave a Reply