zindagi ka ye ajab dastur hai
paas jo jitna hai utna duur hai
aks aa.e bhi to kya aa.e nazar
ek shisha vo bhi chakna-chur hai
ho sadaqat ka alam kyunkar buland
daar hai lekin bina mansur hai
haal ki be-rahmiyon ke bavajud
qalb maazi se abhi maḳhmur hai
kis tarah koi sukun paa.e jahan
har nafas dahka hua tandur hai
ḳhud hai har ik aadmi apna hisar
jitna jo azad hai mahsur hai
kal bhi ujrat ke liye tha dar-ba-dar
aaj bhi faqa-zada mazdur hai
qaidi-e-vahm-o-guman hona ‘nihal’
mahv-e-hairat huun tujhe manzur hai
Leave a Reply