Ajay Sahaab
tanhaiyon men ashk bahane se kya mila
ḳhud ko diya bana ke jalane se kya mila
mujh se bichhaḌ ke ret sa vo bhi bikhar gaya
us jaane vaale shaḳhs ko jaane se kya mila
ab bhi mire vajud men har saans men vahi
main sochta huun us ko bhulane se kya mila
tu kya gaya ki dil mira ḳhamosh ho gaya
in dhaḌkanon ke shor machane se kya mila
apne hi ek dard ka chara na kar sake
saare jahan ka dard uThane se kya mila
jis ke liye likha use vo to na sun saka
vo giit mahfilon ko sunane se kya mila
un ka har ek harf hai dil par likha hua
us dost ke ḳhaton ko jalane se kya mila
socho zara ki tum ne zamane ko kya diya
kyuun sochte ho tum ko zamane se kya mila
Leave a Reply