qulzum-e-ulfat men vo tufan ka aalam hua
jo safina dil ka tha darham hua barham hua
thamna mushkil dil-e-muztar ko sham-e-gham hua
yaad aate hi kisi ki hashr ka aalam hua
kya bata.en kis tarah guzri shab-e-vada miri
muntazir ankhen rahin dil ka ajab aalam hua
dekhte rahte hain is men saare aalam ka zuhur
a.ina dil ka hamare rashk-e-jam-e-jam hua
vo adu ko saath laa.e hain mire ghar dekhiye
sharbat-e-didar ke nusḳhe men daḳhil sam hua
aap ke tir-e-nazar se dil ka bachna hai muhal
jis ko dekha aankh bhar kar bas vahi hamdam hua
kis qadar taskin ranjur-e-mohabbat ko hui
pyaar se dekha jo us ne zaḳhm ko marham hua
jab uThaya yaar ne ru-e-munavvar se naqab
gir paḌa ghash kha ke koi aur koi be-dam hua
gulshan-e-hasti men insan ki nahin kuchh zindagi
jo hua paida misal-e-qatra-e-shabnam hua
gesu-e-pur-ḳham hue un ke pareshan sog men
mere marne se dayar-e-husn men matam hua
baad marne ke hua duniya men yuun mash.hur ‘naz’
shaan se tabut uTTha dhuum ka matam hua
Leave a Reply