kis ki tahvil men the kis ke havale hue log
chashm-e-girya men rahe dil se nikale hue log
kab se rahon men tiri gard bane baithe hain
tujh se milne ke liye vaqt ko taale hue log
kahin ankhon se chhalakne nahin dete tujh ko
kaise phirte hain tire khvab sambhale hue log
daman-e-subh men girte hue taron ki tarah
jal rahe hain tiri qurbat ke ujale hue log
ya tujhe rakhte hain ya phir tiri khvahish dil men
aise duniya men kahan chahne vaale hue log
Leave a Reply