Poet
jalega chand sitare dhuan uḌa.enge
hamare ḳhvab tiri aankh men jab a.enge
miri nazar se vo chehre utar nahin sakte
jinhen ye ahl-e-nazar jald bhuul ja.enge
ghazal sunao bahalna bahut zaruri hai
hansenge log ham aansu agar baha.enge
phir aa.i shaam daraḳhton pe ghonsle jaage
magar ham aaj bhi ai dost ghar na ja.enge
udaas rahiye na ukta ke ḳhud-kushi kiije
vo din qarib hai jab aap gul khila.enge
kafan se kam nahin jaaḌe ki chandni ‘rahi’
ab is ko oḌh ke ham kaise muskura.enge
Leave a Reply