kab is se qabl nazar men gul-e-malal khila
kisi ki yaad men lekin ye ab ke saal khila
ajiib ab-o-hava thi ajiib thi mitti
so dil ke goshe men ik phuul be-misal khila
main chhu ke dekh rahi thi ki sabza-e-rukh par
gulab-e-surkh ki surat tira jamal khila
main dam-ba-khud hi rahi aur shisha-e-jan par
misal-e-reza-e-khurshid ik visal khila
safar ki shaam sitara nasib ka jaaga
phir asman-e-mohabbat pe ik hilal khila
isi tarah se tiri yaad gul khilati rahi
ki zakhm bharne laga jab to indimal khila
ye vaqia hai ki is baar to bahar ke baad
khila hai gulshan-e-ummid aur kamal khila
Leave a Reply