Mohammad Izhar Ul Haq
najat ke liye roz-e-siyah mangti hai
zamin ahl-e-zamin se panah mangti hai
bhara na atlas-o-marmar se peT ḳhilqat ka
ye bad-nihad ab ab-o-giyah mangti hai
riyazaton se farishta-sifat to ho na saki
mohabbat aa.i hai tab-e-gunah mangti hai
vo rang-e-kucha-o-bazar hai ki ab basti
gharon se duur alag qatl-gah mangti hai
ragon men dauḌta phirta hai ijz sadiyon ka
ra.i.yat aaj bhi ik badshah mangti hai
Leave a Reply