naam shaitan se mash.hur hamara hota
apne pichhe bhi agar koi idara hota
auj par apne muqaddar ka sitara hota
ik minister ka hi chamcha jo hamara hota
apne jiine ka yahi ek sahara hota
kisi tirpaT ka sahi koi ishara hota
ek shadi ne hi sab baal jhaḌa Daale hain
ye amal kahiye ki phir kaise dobara hota
be-paḌhe apni ghazal bazm se ham lauTe hain
tum ne sahvan hi sahi naam pukara hota
doctor aaj ke tajir hi na hone paate
charasazon se agar bachne ka chara hota
koi sha.ir bhi mire aage na Tik paata ‘rahim’
mera maidan-e-suḳhan pe jo ijara hota
Leave a Reply