Iqbal Azeem
ai ahl-e-vafa dad-e-jafa kyuun nahin dete
so.e hue zaḳhmon ko jaga kyuun nahin dete
is jashn-e-charaghan se to behtar the andhere
in jhuTe charaghon ko bujha kyuun nahin dete
jis men na koi rang na ahang na ḳhushbu
tum aise gulistan ko jala kyuun nahin dete
divar ka ye uzr suna ja.ega kab tak
divar agar hai to gira kyuun nahin dete
chehron pe jo Daale hue baiThe hain naqaben
un logon ko mahfil se uTha kyuun nahin dete
tauba ka yahi vaqt hai kya soch rahe ho
sajde men jabinon ko jhuka kyuun nahin dete
ye jhuTe ḳhuda mil ke Dubo denge safina
tum hadi-e-bar-haq ko sada kyuun nahin dete
Leave a Reply