ham chal diye to raste hamvar ho ga.e
aur ruk ga.e to saya-e-divar ho ga.e
ab kya piyen sharab ki saaqi ba-qadr-e-zarf
tujh se nazar mila ke gunahgar ho ga.e
daur-e-ḳhizan men jin ko tha divangi ka shauq
fasl-e-bahar aate hi hoshiyar ho ga.e
ahl-e-zamin ko dekh ke kuchh sakinan-e-arsh
hairan hue to naqsh-ba-divar ho ga.e
ta-umr sochte hi rahe ham ki zindagi
hai kya azaab jis men giraftar ho ga.e
avaz di thi maut ko ye kaun aa gaya
ham phir se zindagi ke talabgar ho ga.e
‘nashtar’ ḳhayal-e-gesu-e-janan liye hue
aa.i kuchh aisi niind ki bedar ho ga.e
Leave a Reply