ghurur-e-koh ke hote niyaz-e-kah rakhte hain
tire ham-rah rahne ko qadam kotah rakhte hain
andheron men bhi gum hoti nahin samt-e-safar apni
nigahon men firozan ik shabih-e-mah rakhte hain
ye duniya kya hamen apni Dagar par le ke ja.egi
ham apne saath bhi marzi ki rasm-o-rah rakhte hain
vo divar-e-ana ki oT kis kis aag jalta hai
dil o diida ko sab ahval se agah rakhte hain
Dar-o-bast-e-jahan men dekhte hain saqm kuchh ‘ali’
aur apni soch ka ik naqsha-e-islah rakhte hain
Leave a Reply