Pinhaan
ḳhabar kahan thi mire ilm-e-iktisabi ko
kitab-e-dil hai bahut haq ki bazyabi ko
vo zabt-e-shauq jo buniyad-e-zabt-e-mai-ḳhana
usi ka hosh na saaqi ko na sharabi ko
abhi kahan hai mire zaḳhm-e-dil ki vo rangat
gulab dekh ke jal jaa.e jis gulabi ko
ḳhuda ke samne insan ki taraf-dari
aziiz rakhta hai dil apni is ḳharabi ko
ghazal ko Dar hai ki zinda na dafn ho ‘pinhan’
saza mile na sadaqat ki be-hijabi ko
Leave a Reply