yadon ke sab rang uda kar tanha huun
apni basti se duur aa kar tanha huun
koi nahin hai mere jaisa charon or
apne gird ik bhiid saja kar tanha huun
jitne log hain utni hi avazen hain
lahjon ka tufan utha kar tanha huun
raushniyon ke aadi kaise janenge
ankhon men do diip jala kar tanha huun
jis manzar se guzri thi main us ke saath
aaj usi manzar men aa kar tanha huun
paani ki lahron par bahti ankhon men
kitne bhule khvab jaga kar tanha huun
mera pyara sathi kab ye janega
dariya ki aghosh tak aa kar tanha huun
apna aap bhi kho dene ki khvahish men
us ka bhi ik naam bhula kar tanha huun
Leave a Reply