Saqib Lakhnavi
ek ek ghaḌi us ki qayamat ki ghaḌi hai
jo hijr men taḌpa.e vahi raat baḌi hai
ye zo.af ka aalam hai ki taqdir ka likha
bistar pe huun main ya koi tasvir paḌi hai
betabi-e-dil ka hai vo dilchasp tamasha
jab dekho shab-e-hijr mire dar pe khaḌi hai
dekha to zamana gila-e-hijr se kam tha
samjha tha ki furqat se shab-e-vasl baḌi hai
rone se haya sham.a ki zahir ho to kyuun kar
uryan hai magar beach men mahfil ke khaḌi hai
ab tak mujhe kuchh aur dikha.i nahin deta
kya janiye kis aankh se ye aankh laḌi hai
mar ja.un jo main vadi-e-ulfat men ajab kya
maqsad hai mira saḳht to manzil bhi kaḌi hai
kab aaoge vaqt aa gaya duniya se safar ka
vaqfa hai koi dam ka na saa.at na ghaḌi hai
kad hai vo mujhe kuuch men aane nahin dete
apna hai ḳhayal un ko mujhe dil ki paḌi hai
himmat ko nazar pa nahin sakti kisi surat
dil koi baḌa hai jo koi aankh baḌi hai
ai hashr numa.inda-e-raftar Thahar ja
us zulf ke sadqe jo tiri paanv paḌi hai
taḌpa diya dil gundh ke gesu shab-e-vaslat
main janta tha piiTh pe phulon ki chhaḌi hai
bala-e-jabin ḳhuun jab aaya to araq kya
ai jalva-gah-e-husn tiri dhuup kaḌi hai
aadhi se ziyada shab-e-gham kaaT chuka huun
ab bhi agar aa jaao to ye raat baḌi hai
ara.ish-e-gesu ko hasin maang rahe hain
‘saqib’ ki ghazal kya koi moti ki laḌi hai
Leave a Reply