Faza Ibn E Faizi
tu hai ma.ani parda-e-alfaz se bahar to aa
aise pas-manzar men kya rahna sar-e-manzar to aa
aaj ke saare haqa.eq vahimon ki zad men hain
Dhalna hai tujh ko ḳhvabon se koi paikar to aa
tu sahi ik aks lekin ye hisar-e-a.ina
log tujh ko dekhna chahen barun-e-dar to aa
za.iqa zaḳhmon ka yuun kaise samajh men aa.ega
phenkna hai band paani men koi patthar to aa
jism-e-ḳhaki tujh ko shishe ki haveli hi sahi
ai charagh-e-jan kabhi fanus ke bahar to aa
is jagah ahang men Dhalti hain dil ki dhaḌkanen
aa mire gahvara-e-ehsas ke andar to aa
bar-ha ji men ye aa.i umr-e-rafta se kahun
shaam hone ko hai ai bhule musafir ghar to aa
Leave a Reply