Syed Sarosh Asif
mujh men koi mujh jaisa ho aisa bhi ho sakta hai
ya phir koi aur chhupa ho aisa bhi ho sakta hai
us ke haath men ghubbare the phir bhi bachcha gum-sum tha
vo ghubare bech raha ho aisa bhi ho sakta hai
ek risala paḌhte paḌhte us ki ankhen bhar aa.iin
us men mera sher chhapa ho aisa bhi ho sakta hai
ambar bhi niila niila hai dariya bhi niila niila
un donon ne zahr piya ho aisa bhi ho sakta hai
sahra men jab pyaas lagi to meri vahshat ne socha
qais ne ḳhud ka ḳhuun piya ho aisa bhi ho sakta hai
jis ki ḳhatir beach safar men us ne mujh ko chhoḌa tha
vo bhi us ko chhoḌ gaya ho aisa bhi ho sakta hai
Leave a Reply