Mujh Mein Koi Mujh Jaisa Ho Aisa Bhi Ho Sakta Hai

mujh meñ koī mujh jaisā ho aisā bhī ho saktā hai

yā phir koī aur chhupā ho aisā bhī ho saktā hai

us ke haath meñ ġhubbāre the phir bhī bachcha gum-sum thā

vo ġhubāre bech rahā ho aisā bhī ho saktā hai

ek risāla paḌhte paḌhte us kī āñkheñ bhar aa.iiñ

us meñ merā sher chhapā ho aisā bhī ho saktā hai

ambar bhī niilā niilā hai dariyā bhī niilā niilā

un donoñ ne zahr piyā ho aisā bhī ho saktā hai

sahrā meñ jab pyaas lagī to merī vahshat ne sochā

qais ne ḳhud kā ḳhuun piyā ho aisā bhī ho saktā hai

jis kī ḳhātir beach safar meñ us ne mujh ko chhoḌā thā

vo bhī us ko chhoḌ gayā ho aisā bhī ho saktā hai

Leave a Comment