ashiq-e-zulf-o-ruḳh-e-dildar ankhen ho ga.iin
mubtala-e-kafir-o-dindar ankhen ho ga.iin
surḳh palken ho ga.iin ḳhun-bar ankhen ho ga.iin
dekh lo ab zaḳhm-e-daman-dar ankhen ho ga.iin
dekh kar mahv-e-jamal-e-yar ankhen ho ga.iin
jam-ha-e-sharbat-e-didar ankhen ho ga.iin
aa.iyo ai ashk ab bahne laga hai ḳhun-e-garam
bhejiyo paani ki atish-bar ankhen ho ga.iin
laḌ ga.iin tum se jo ankhen ho ga.i ik baar sulh
kijiye do-tin baten chaar ankhen ho ga.iin
kashti-e-mai le ke ai saaqi pahunch bahr-e-ḳhuda
be tire mahfil men dariya-bar ankhen ho ga.iin
hai tasavvur bas-ki ankhon men ḳhat-e-ruḳhsar ka
aa.ine ki tarah jauhar-dar ankhen ho ga.iin
ai but-e-kafir hai bas be-aib zaat allah ki
lab tire iisa hue bimar ankhen ho ga.iin
bah ga.iin palken ba-rang-e-ḳhas miri ashkon ke saath
ab to nazron men gul-e-be-ḳhar ankhen ho ga.iin
chashm-e-baddur in ko gardish hai ajab andaz se
ai pari ahu-e-ḳhush-raftar ankhen ho ga.iin
mere paanv ki tarah haihat ab gardish men hain
kis ki ye varafta-e-raftar ankhen ho ga.iin
ain nadani hai ab un se jo rakhiye chashm-dasht
shakl-e-mizhgan phir ga.iin bezar ankhen ho ga.iin
laḳht-e-dil yaqut men aansu hain moti ab-dar
aao dekho jauhari bazar ankhen ho ga.iin
do to hain chashm-e-suḳhan-go gar nahin hai ik dahan
chup na rahiye qabil-e-guftar ankhen ho ga.iin
ishq-e-pinhan dida-e-giryan ne zahir kar diya
hansne ki ja hai lab-e-iz.har ankhen ho ga.iin
ablaq-e-chashm-e-sanam kis naaz se gardish men hai
ḳhuub kaave hote hain rahvar ankhen ho ga.iin
har kisi ne aankh jab Daali gulu-e-saf par
hans ke farmaya gale ka haar ankhen ho ga.iin
tol lete hain sada nazron men jins-e-husn ko
palla-e-mizan miri ai yaar ankhen ho ga.iin
hai tasavvur roz-o-shab kis ki tila.i rang ka
chashm-e-nargis ki tarah zardar ankhen ho ga.iin
kahte ho sab dekhte hain teri ankhon se mujhe
sach kaho aghyar ki bekar ankhen ho ga.iin
chaliye ab sahra se ku-e-yar unhen dikhla.iye
ablon se paanv men do-char ankhen ho ga.iin
phuul nargis ke bana.e kab vahan me.amar ne
ye hamari naqsh-bar-divar ankhen ho ga.iin
ai ḳhuda shahid hamara summa-vaj.hullah hai
jab nigah ki but pe tujh se chaar ankhen ho ga.iin
aap sa in ko banaya ishq-e-tir-e-yar ne
hai siri tar-e-nigah sufar ankhen ho ga.iin
pesh-e-nargis haath phaila.e hain shaḳhon se daraḳht
kis ko dekhenge jo ab darkar ankhen ho ga.iin
chup khaḌe hain ban ga.e hain naqsh-bar-divar ham
aao dekho rauzan-e-divar ankhen ho ga.iin
saqi-o-mina-o-saghar ek aate hain nazar
bada-e-vahdat se kya sarshar ankhen ho ga.iin
rote rote hijr men suuje hain ye chashman-e-tar
jism laghar ho gaya tayyar ankhen ho ga.iin
ashiq-e-abru huun karna dida-o-danista qatl
jauharon se tujh men ai talvar ankhen ho ga.iin
aankh ke Doron ne tere kuchh to hain dhage diye
ai sanam jo ma.il-e-zunnar ankhen ho ga.iin
phir gaya vo aa ke ab jaage to kya hasil ‘vazir’
so ga.e jab baḳht tab bedar ankhen ho ga.iin
Leave a Reply