Dil Ayubi
saare nuqush jis pe tire ashiyan ke hain
dair-o-haram ghubar usi karvan ke hain
vadi-e-kohsar-o-bayaban-o-gulistan
ajza-e-rang-rang miri dastan ke hain
har chand ku-e-yar bahut fasle pe hai
badle hue abhi se mizaj asman ke hain
hamdam hansi uḌa na dil-e-dagh-dagh ki
tohfe diye hue ye kisi mehrban ke hain
hon zehn ke dariche agar va to dekh le
parvarda sab yaqin mire husn-e-guman ke hain
kya dushmanon ki kijiye ai ‘dil’ shikayaten
maare hue to ham karam-e-dostan ke hain
Leave a Reply