Sajjad Syed
divane zara raqs-e-junun tez kiye ja
mantiq se ḳhirad ki abhi parhez kiye ja
main tere ma.a.ib ko mahasin hi kahunga
tu zarf-e-ana ko mere labrez kiye ja
ḳhamosh na rah ghuncha-e-sar-basta ki surat
lab khol tu mahaul ko gul-rez kiye ja
sairab tu kar lauh-o-qalam ḳhun-e-jigar se
tu kisht-e-suḳhan-zar ko zarḳhez kiye ja
ḳhud khinch ke chali aa.egi vo laila-e-manzil
bas zauq-e-talab ko yunhi mahmez kiye ja
Leave a Reply