Qamar Raza Shahzad
na.i zamin naya asman banana hai
tire makan se behtar makan banana hai
jo baat sach hai nahin kholni zamane par
taḳhaiyyulat ko husn-e-bayan banana hai
hava se teri himayat men guftugu ke ba.ad
diye ki lau ko tira pasban banana hai
talash karne hain kuchh apne jaise log mujhe
aur ek halqa-e-avargan banana hai
sipurd kar ke kisi ko makan-e-dil ‘shahzad’
ḳhud apne-ap ko be-ḳhanuman banana hai
Leave a Reply