soḳhta kashti ka malba main mira dil aur shaam
gham-zada utre hue dariya ka sahil aur shaam
raat ke ik pesh-ras taare ki dhaḌkan tez tez
aankh men sahme hue ḳhvabon ki jhilmil aur shaam
ḳhastagi se chuur paanv hasrat-e-vamandgi
kohr men Duubi hui mauhum manzil aur shaam
ashiyan men muntazir bachchon ka karb-afza ḳhayal
rishta barpa ta.eron ka raqs-e-bismil aur shaam
main ye kaghaz aur ashk-alud sheron ka nuzul
ek vaadi ek chashme ki taral-ril aur shaam
Leave a Reply