Kahin Yaqin Se Na Ho Jaen Hum Guman Ki Tarah

kahin yaqin se na ho jaaen ham guman ki tarah

sambhal kar hamen rakhiye mata-e-jan ki tarah

jise sadaf ki tarah aankh men chhupaya tha

vo kho na jaae kahin ashk-e-raegan ki tarah

hamen bhi khauf-e-talatum ne gher rakha tha

khula nahin tha abhi vo bhi badban ki tarah

nisab-e-ishq men saare saval mushkil the

mohabbaten bhi thiin darpesh imtihan ki tarah

khule jo lab to unhi ainon men hairat thi

jo dekhte the hamen aks-e-be-zaban ki tarah

jahan mili thiin kabhi khushbuen havaon se

mahak raha tha vo jangal bhi gulistan ki tarah

hunar-vari hai hamari ki apne khvabon se

qafas bhi ham ne sajaya tha ashiyan ki tarah

Leave a Comment