Insan Ke Liye Is Duniya Mein Dushnam Se Bachna Mushkil Hai

Anand Narayan Mulla

insan ke liye is duniya men dushnam se bachna mushkil hai

taqsir se bachna mumkin hai ilzam se bachna mushkil hai

taa.ir ke liye dushvar nahin sayyad-o-qafas se duur rahe

lekin jo shakl-e-nasheman hai us daam se bachna mushkil hai

daman ko bacha bhi len shayad sahra ke nukile kanTon se

gulshan ke magar gul-ha-e-sharar-andam se bachna mushkil hai

is hadisa-gah-e-hasti men Takra.enge do dil kuchh bhi karo

pariyon ke liye vo laakh uḌen gulfam se bachna mushkil hai

auham ki tariki to miTa sakte hain jala kar sham.a-e-ḳhirad

lekin ḳhud aql ke za.ida auham se bachna mushkil hai

ai arz-e-sahar ke rah-ravo manzil pe pahunchne se pahle

har qafila jis ne luuT liya us shaam se bachna mushkil hai

kuchh qatra-e-mai uupar uupar phir dard hi dard andar andar

aghaz-e-mohabbat ḳhuub magar anjam se bachna mushkil hai

ik ḳhuun aur gosht ke insan ka ma.abud tiri jannat ki qasam

huron se churana aankh asan asnam se bachna mushkil hai

insan ki hai aulad agar vo ‘mulla’ ho ya aur koi

hangam-e-javani falsafa-e-‘ḳhayam’ se bachna mushkil hai