nusrat-mehdi

Aap Shayad Bhul Baithe Hain Yahan Main Bhi To Hun

aap shayad bhuul baithe hain yahan main bhi to huun

is zamin aur asman ke darmiyan main bhi to huun

haisiyat kuchh bhi nahin bas ek tinke ki tarah

fikr-o-fan ke is samundar men ravan main bhi to huun

be-sabab be-jurm patthar shahzadi ban gai

bas yahi thi ik sada-e-be-zaban main bhi to huun

inkisari paedari sab rava-dari gai

jab takabbur ne kaha badh kar myaan main bhi to huun

aaj is andaz se tum ne mujhe avaz di

yak-ba-yak mujh ko khayal aaya ki haan main bhi to huun

tere sheron se mujhe mansub kar dete hain log

naaz hai mujh ko jahan tu hai vahan main bhi to huun

ruthna kya hai chalo main hi mana laun use

be-rukhi se us ki ‘nusrat’ nim-jan main bhi to huun

More Poems

Leave a Comment