ishq men ma.arke bala ke rahe
aḳhirash ham shikast kha ke rahe
ye alag baat hai ki haare ham
hashr ik baar to uTha ke rahe
safar-e-gham ki baat jab bhi chali
tazkire tere naqsh-e-pa ke rahe
jab bhi aa.i koi ḳhushi ki ghaḌi
din ghamon ke bhi yaad aa ke rahe
jis men saara hi shahr dafn hua
faisle sab aTal hava ke rahe
apni surat bigaḌ ga.i lekin
ham unhen a.ina dikha ke rahe
honT tak si diye the phir bhi ‘nazar’
zulm ki dastan suna ke rahe
Leave a Reply