Ishq Mein Marke Bala Ke Rahe

ishq meñ ma.arke balā ke rahe

āḳhirash ham shikast khā ke rahe

ye alag baat hai ki haare ham

hashr ik baar to uThā ke rahe

safar-e-ġham kī baat jab bhī chalī

tazkire tere naqsh-e-pā ke rahe

jab bhī aa.ī koī ḳhushī kī ghaḌī

din ġhamoñ ke bhī yaad aa ke rahe

jis meñ saarā hī shahr dafn huā

faisle sab aTal havā ke rahe

apnī sūrat bigaḌ ga.ī lekin

ham unheñ ā.īna dikhā ke rahe

hoñT tak sī diye the phir bhī ‘nazar’

zulm kī dāstāñ sunā ke rahe

Leave a Comment