naqqad apne aap ka be-lag aisa kaun hai
hona mira ik vahm hai dekhun ye kahta kaun hai
vo aftab-e-husn hai jalve luTa.e ja.ega
us ko ab is se kya gharaz mushtaq kitna kaun hai
vahdat hai ye bhi didani main huun nazar vo raushni
go ye girah khulti nahin a.ina kis ka kaun hai
main apne gumbad ka makin saaya sa dekha Dar gaya
ab kya bita.un kya suna jab main ne puchha kaun hai
bas ik hava ka pher hai vo bhi hava ho ja.ega
main sochta rah ja.unga mujh men ye mujh sa kaun hai
meri nazar jis par paḌi ik rabton ka Dher tha
phir vo jo apne aap ko kahta hai tanha kaun hai
ab fikr is ki kijiye duniya rahegi ya nahin
ab is ko jaane dijiye duniya men kaisa kaun hai
tah ki lagan ik Dhong hai bas tairna aata nahin
tah karne vaala sat.h ko ye shaḳhs hota kaun hai
ye bazm-e-danish hai ‘muhib’ tasvir-e-nafs-e-mutma.in
is bazm men chun-o-chara sha.er ki sunta kaun hai
Leave a Reply