Saghar Nizami
phir rah-e-ishq vahi zad-e-safar mange hai
vaqt phir qalb-e-tapan dida-e-tar mange hai
sajde maqbul nahin bargah-e-naz men ab
astan husn ka sajde nahin sar mange hai
kis ne pahuncha diya us hosh-ruba vaadi men
ki jahan vahshat-e-dil zad-e-safar mange hai
meri duniya ke taqazon hi pe mauquf nahin
diin bhi ek naya fikr-o-nazar mange hai
ishq ko zaviya-e-did badalna hoga
jalva-e-husn naya zauq-e-nazar mange hai
sab ki ankhon se bacha kar jo kabhi luuTe the
vaqt har chor se vo la.al-o-gohar mange hai
diin o duniya ho ki ho ishq o havas ai ‘saghar’
har koi ḳhun-e-jigar ḳhun-e-jigar mange hai
Leave a Reply