aghaz-e-mohabbat men barson yuun zabt se ham ne kaam liya
jab huuk kaleje men uTThi to hathon se dil thaam liya
us rashk ke hathon ek na ik har roz hi daagh uThate rahe
ham choT jigar par kha baiThe jab ghair ne tera naam liya
ankhen vo jhuken milte milte rahe hosh-o-ḳhirad jaate jaate
kuchh sharm ne un ko rok liya kuchh zabt ne ham ko thaam liya
insan ki thi ye tab-o-tavan jo bar-e-mohabbat uTha sakta
ek ye bhi hai ehsan tira kya us se tu ne kaam liya
sahra men ThanDe vaqt hamen yaad aa.i jo us ki jalvagari
kuchh aisi hui vahshat dil ko dam ja ke zer-e-bam liya
aur us ke siva kuchh kah na sake puchha jo kisi ne haal hai kya
ankhon se aansu bahne lage hathon se kaleja thaam liya
luuTa teri donon ankhon ne paaya jo mire dil ko tanha
jo ek ne sabr shakeb liya to ek ne chain aram liya
ab tak to ḳhabar li us ne miri jis vaqt koi uftad paḌi
jab Thokaren kha kar girne laga haath us ne lapak kar thaam liya
ham laa.en kahan se vo ankhen jo tum ko pasheman dekh saken
ab kaisi nadamat jab ham ne sab apne sar ilzam liya
mahrumi-e-qismat kya kahiye ehsan kiya kab saaqi ne
paimana-e-umr chhalak hi gaya jab haath men apne jaam liya
mauzun jo hue jazbat-e-dil jab sher-e-‘hafiz’ paḌha ham ne
sunte hi donon hathon se same.a ne kaleja thaam liya
Leave a Reply