kitna DhunDa use jab ek ghazal aur kahi
jab mila hi nahin tab ek ghazal aur kahi
ek ummid mulaqat men likkhi sar-e-sham
aur phir aḳhir-e-shab ek ghazal aur kahi
ik ghazal likkhi to gham koi purana jaaga
phir usi gham ke sabab ek ghazal aur kahi
us ghazal men kisi be-dard ka naam aata tha
so pa.e bazm-e-tarab ek ghazal aur kahi
jante bujhte ik misra-e-tar ki qimat
dil-e-bedad-talab ek ghazal aur kahi
dil ki dhaḌkan ko hi pairaya-e-iz.har kiya
sil chuke jab mire lab ek ghazal aur kahi
daf.atan ḳhud se mulaqat ka ehsas hua
muddaton ba.ad jo ab ek ghazal aur kahi
vahshat-e-hijr bhi tanha.i bhi main bhi ‘anjum’
jab ikaTThe hue sab ek ghazal aur kahi
Leave a Reply