mere shikve ka zara us pe asar ho to sahi
mehrban mujh pe kabhi us ki nazar ho to sahi
dekhne vaale mira azm-e-safar dekhenge
manzil-e-shauq koi pesh-e-nazar ho to sahi
jalve qudrat ke to bikhre hue kaunain men hain
dekhne vaala koi ahl-e-nazar ho to sahi
main masarrat bhare lamhon ka karun istiqbal
mire hisse men hasin sham-o-sahar ho to sahi
muskurane ki tamanna to mujhe hai lekin
koi lamha gham-e-dauran se mafar ho to sahi
hech har chiiz zamane ki nazar aa.egi
tujh ko ḳhud apni haqiqat ki ḳhabar ho to sahi
main bhi ‘ma.asum’ samajh lunga hai duniya jannat
aish-o-aram se kuchh roz basar ho to sahi
Leave a Reply