qalb ko barf-ashna na karo
gul kisi taur ye diya na karo
zindagi bhi hai ek marg-e-davam
tum jo jiine ka haq ada na karo
jis men phulon pe paanv dharna paḌe
iḳhtiyar aisa rasta na karo
zahr pi jaao bankpan ke saath
zahr chakhne ka tajraba na karo
gur sikha.e jo jang-bazi ke
aisi danish ko rahnuma na karo
zulm to zalimon ka sheva hai
qahr hai tum jo tajziya na karo
sab ḳhizan zaade kah rahe hain ‘hazin’
yaan pe zikr-e-gul-o-saba na karo
Leave a Reply