beach manjdhar diya baḌh ke sahara kis ne
ham to tanha the hamen paar utara kis ne
zindagi tujh ko shab-o-roz ke dozaḳh men tire
jis tarah ham ne guzara hai guzara kis ne
haal ab ye ki andhera mire ḳhuun ka pyasa
rakh diya hai miri muTThi men sitara kis ne
sar-burida koi bachcha mire andar har roz
puchhta rahta hai mujh se mujhe maara kis ne
paanv lag jaa.en tasavvur ko to ham chal niklen
ham ko ḳhvabon ki guzargah se pukara kis ne
ishq nuqsan ka sauda tha ‘zafar’ mere ba.ad
jaane bardasht kiya mera ḳhasara kis ne
Leave a Reply