Duniya Meri Bala Jaane Mahngi Hai Ya Sasti Hai

Fani Badayuni

duniya meri bala jaane mahngi hai ya sasti hai

maut mile to muft na luun hasti ki kya hasti hai

abadi bhi dekhi hai virane bhi dekhe hain

jo ujḌe aur phir na base dil vo nirali basti hai

ḳhud jo na hone ka ho adam kya use hona kahte hain

niist na ho to hast nahin ye hasti kya hasti hai

ijz-e-gunah ke dam tak hain ismat-e-kamil ke jalve

pasti hai to bulandi hai raz-e-bulandi pasti hai

jaan si shai bik jaati hai ek nazar ke badle men

aage marzi gahak ki in damon to sasti hai

vahshat-e-dil se phirna hai apne ḳhuda se phir jaana

divane ye hosh nahin ye to hosh-parasti hai

jag suuna hai tere baghair ankhon ka kya haal hua

jab bhi duniya basti thi ab bhi duniya basti hai

aansu the so ḳhushk hue ji hai ki umDa aata hai

dil pe ghaTa si chha.i hai khulti hai na barasti hai

dil ka ujaḌna sahl sahi basna sahl nahin zalim

basti basna khel nahin baste baste basti hai

‘fani’ jis men aansu kya dil ke lahu ka kaal na tha

haa.e vo aankh ab paani ki do bundon ko tarasti hai